តើមិត្តអ្នកអានអាចទាយបានទេថា រូបមួយណាថ្ងៃរះ រូបមួយណាថ្ងៃលិច ?
Monthly Archives: ខែមករា 2012
កំណាត់ផ្លូវ កំពង់ចាម ភ្នំពេញ
កំណាត់ផ្លូវ កំពង់ចាម-ភ្នំពេញ មានរយៈចម្ងាយ 124 គ.ម ដែលក្នុងនោះ 42 គ.ម ត្រូវបើកបរក្នុងទឹកដី ខែត្រកណ្ដាល ឯ 82 គ.ម ទៀតក្នុងទឹកដី ខែត្រកំពង់ចាម ។ រួមជាមួយនោះផងដែរ យើងត្រូវធ្វើដំណើរលើផ្លូវជាតិចំនួន 2 ខ្សែ ៖
- ខ្សែទី 1 ផ្លូវជាតិលេខ 6A ពី ភ្នំពេញ ទៅដល់ ស្គន់ ស្រុកជើងព្រៃ មានរយៈចម្ងាយ 70 គ.ម ។
- ខ្សែទី 2 ផ្លូវជាតិលេខ 7 ពី ស្គន់ ទៅដល់ ស្នូល ខែត្រក្រចេះ ។
ក្នុងប្រកាសនេះ ខ្ញុំលើកយកតែកំណាត់ផ្លូវពី កំពង់ចាម-ភ្នំពេញ ទេ ដោយចាប់ផ្ដើមចេញដំណើរពី នាគព័ន្ធ មុខ វត្តនគរបាជ័យ ។
គិតចាប់ពីចំណុច នាគព័ន្ធ នេះ យើងស្ថិតនៅ ស្រុកកំពង់សៀម យើងបន្តដំណើរប្រហែលជាបាន 2 គ.ម យើងនឹងឃើញ រោងចក្រវាយនភណ្ឌ នៅខាងឆ្វេងដៃ និង ផ្លូវទៅកាន់ ទំនប់ជ្រោយចេក នៅខាងស្កាំដៃ ។ បន្តទៅប្រហែលជា 3 គ.ម ទៀតយើងនិងបានឃើញស្លាកសម្គាល់បញ្ជាក់ថាមកដល់រមណីយដ្ឋាន ភ្នំប្រុស-ភ្នំស្រី ។
យើងធ្វើដំណើរបន្តទៅទៀត បានប្រហែលជា 8 គ.ម យើងនឹងទៅដល់ផ្លូវបំបែក ត្រើង ដែលបត់ស្ដាំយើងនឹងទៅដល់ ស្រុកចម្ការលើ ក្នុងរយៈចម្ងាយប្រមាណ 35 គ.ម ។ បើយើងបន្តដំណើរទៅត្រង់ យើងនឹងចូលមកដល់ទឹកដី ស្រុកព្រៃឈរ ។ នៅតាមដងផ្លូវយើងនឹងឃើញអ្នកស្រុកអ្នកភូមិ ព្យួរនំជាច្រើនប្រភេទ (ស្គាល់តែ នំខ្ញី មួយមុខគត់) រណែងរណោងសម្រាប់លក់ ។ បន្តដំណើរបាន 15 គ.ម យើងនឹងមកដល់ទីប្រជុំជន ព្រៃទទឹង ស្រុកព្រៃឈរ ដែលមានផ្លូវបំបែកជា ៤ ។ បើបត់ស្ដាំហើយបន្តដំណើររយៈចម្ងាយ 18 គ.ម ទៀត យើងនឹងទៅដល់រមណីយដ្ឋាន ព្រះធាតុទឹកឆា ។ បើបត់ឆ្វេង យើងទៅដល់ ស្រុកកងមាស ។
យើងបន្តធ្វើដំណើរមកត្រង់ប្រហែលជា 20 គ.ម យើងនឹងមកដល់ទីប្រជុំជន ស្គន់ ស្រុកជើងព្រៃ ។ បើយើងបត់ស្ដាំ យើងនឹងឡើងតាមផ្លូវជាតិលេខ 6 ដែលអាចនាំយើងទៅកាន់ ខែត្រកំពង់ធំ ខែត្រសៀមរាប ។ បើយើងធ្វើដំណើរទៅត្រង់ យើងនឹងឡើងតាមផ្លូវជាតិលេខ 6A ។ ទៅហួសពីទីប្រជុំជនប្រហែល 2 គ.ម យើងអាចឃើញអាហារដ្ឋានតូចធំជាច្រើនអមសងខាងផ្លូវសម្រាប់ទទួលភ្ញៀវដែលត្រូវការឈប់សម្រាកមុននឹងបន្តដំណើរទៅមុខទៀត ។ កន្លែងនេះជាកន្លែងតែមួយគត់ដែលយើងអាចរកទិញ អាពីង យកទៅញ៉ាំបាន ។ ជាមួយនេះផងដែរ ក៏មានតូបតូចៗ ដាក់លក់នូវនំចំណីផ្លែឈើនានា ជាពិសេស ម្នាស់ទឹកឃ្មុំ ។ បន្តដំណើរទៅទៀត យើងនឹងឃើញស្លាកបញ្ជាក់ថាផ្លូវបត់ស្កាំចម្ងាយ 2,3 គ.ម នឹងនាំយើងទៅដល់រមណីយដ្ឋាន ភ្នំជើងព្រៃ ។ បើយើងបន្តដំណើរទៅមុខទៀតនៅតាមដងផ្លូវ យើងនឹងឃើញអ្នកស្រុកអ្នកភូមិ ដាក់លក់នូវផ្លែឈើជាច្រើនដូចជា ផ្លែទឹកដោះ ផ្លែសាវម៉ាវ ផ្លែស្វាយ តាមរដូវកាលជាក់ជាមិនខាន ។
បន្តដំណើរប្រហែលជាជាង 10 គ.ម យើងនឹងមកដល់ទីប្រជុំជន ផ្អាវ ស្រុកបាធាយ ។ បន្តចេញពីទីប្រជុំជនប្រហែល 2 គ.ម យើងនឹងឃើញ ភ្នំបាធាយ នៅខាងឆ្វេងដៃអបជាប់នឹងផ្លូវតែម្ដង ។ បន្តដំណើរទៅទៀត យើងនឹងឃើញនៅខាងស្កាំដៃយើងសម្បូរទៅដោយទឹក ល្ហល្ហាច ជាមួយនោះផងដែរ មានអ្នកស្រុកអ្នកភូមិដាក់លក់ ផ្លែឈូក ត្រីអាំងត្រីឆ្អើរ ជាពិសេសគឺ ទាទឹក (ខ្ញុំមិនសូវស្គាល់ច្បាស់ដែរ) ដែលគេធ្វើរួចយ៉ាងស្អាតតែម្ដង ហើយដាក់ព្យួរបង្ហាញ ។ ឯនៅខាងឆ្វេងដៃវិញ យើងឃើញភ្នំមួយកំពុងត្រូវបានគេដាក់រំសេវផ្ទុះជារៀងរាល់ថ្ងៃដើម្បីយកថ្ម (ខ្ញុំឃើញជាង 10 ឆ្នាំហើយ មិនទាន់អស់មួយចំហៀងភ្នំទេ) ។
បន្តមកមុខប្រហែលជា 4 គ.ម យើងនឹងមកដល់ផ្លូវបំបែក ថ្នល់កែង ។ បើយើងបត់ឆ្វេង ហើយបន្តដំណើរតាមផ្លូវជាតិលេខ 6A ប្រហែលជា 8 គ.ម យើងនឹងមកដល់ព្រំប្រទល់រវាង ខែត្រកំពង់ចាម និង ខែត្រកណ្ដាល ហើយយើងបន្តធ្វើដំណើរត្រង់រហូតប្រហែលជា 40 គ.ម យើងនឹងមកដល់ ស្ពានជ្រោយចង្វា ដោយឆ្លងកាត់ស្ពានតូចៗ ចំនួន 20 (ស្ពានមួយចំនួនត្រូវបានកម្ទេច ដោយគម្រោងពង្រីកផ្លូវជាតិលេខ 6A) ។ បើយើងបត់ស្ដាំ យើងនឹងធ្វើដំណើរតាមផ្លូវជាតិលេខ 61 ដែលនាំយើងទៅដល់ ព្រែកក្ដាម ដែលតភ្ជាប់ជាមួយផ្លូវជាតិលេខ 5 ដែលយើងអាចធ្វើដំណើរទៅ ខែត្រកំពង់ឆ្នាំង ខែត្រពោធិ៍សាត់ និង ខែត្របាត់ដំបង ។
Short Vocation
Hi dear readers,
The author of this blog will be away for sometime at his hometown. Will be back and bring some photo to beautify this blog.
Best Regards,
Ta Mab
ទំនប់ជ្រោយចេក
ជ្រោយចេក ជាឈ្មោះទំនប់មួយដែលត្រូវបានសាងសង់ដើម្បីរក្សាទឹកទុកស្រោចស្រពវាលស្រែ ។ បូករួមជាមួយរុក្ខជាតិដ៏ស្រស់ស្អាតនៅជុំវិញ និង ប្រភពទឹកមិនចេះរីងស្ងួត ជ្រោយចេក បានទាក់ទាញឲ្យអ្នក ខែត្រកំពង់ចាម មកកម្សាន្តនៅចុងសប្ដាហ៍ ឬ ថ្ងៃបុណ្យឈប់សម្រាក ។ យុវវ័យភាគច្រើនចូលចិត្តមកហែលទឹកលេងនៅទីនេះ ។
ទីតាំងនេះស្ថិតនៅចម្ងាយប្រហែល 15 គីឡូម៉ែត្រពីទីរួមខែត្រ ស្ថិតនៅខាងជើង ស្រុកកំពង់សៀម (ជិះតាមផ្លូវជាតិលេខ 7 ពីកើតទៅលិច មកដល់រោងចក្រវាយនភណ្ឌនៅខាងឆ្វេងដៃ និង ឃើញផ្លូវមួយនៅខាងស្ដាំដៃដែលជាផ្លូវទៅកាន់ទំនប់នេះ) ។ ផ្លូវទៅកាន់ទំនប់មានសភាពល្អ (ផ្លូវដីក្រហម) ហើយមានតូបលក់អាហារនៅនឹងទីតាំងនេះតែម្ដង ។ អ្នកក៏អាចជួលផ្ទះបណ្ដែតទឹកផងដែលដើម្បីសម្រាកស្រូបយកខ្យល់ អាកាសដោយតម្លៃ ២,០០០ ៛ ។ លើសពីនេះអ្នកក៏អាចជួលទូកជិះលេងកម្សាន្តបានផងដែរ ។
ជ្រោយចេក ត្រូវបានសាងសង់នៅកំលុងឆ្នាំ 1975 – 1978 ក្នុង សម័យខ្មែរក្រហម ដើម្បីទុកជាអាងស្តុកទឹកសម្រាប់រដូវប្រាំងដែលអាចខ្វះខាតទឹក ។ ប្រជាជនខ្មែរ ជាច្រើនបានស្លាប់នៅកំលុងពេលសាងសង់ដោយបាក់កម្លាំង និង ខ្វះចំណីអាហារ ឯផ្សេងទៀតត្រូវបានសម្លាប់ដោយ ទាហានខ្មែរក្រហម តែម្ដង ។ ព្រៃទ្រនាប់ ជាកន្លែងដែលកប់សាកសព ។
កំណត់ចំណាំ ៖ តាមអ្វីដែលខ្ញុំដឹង នៅបច្ចុប្បន្ននេះ ទំនប់ជ្រោយចេក មិនមែនជាកន្លែងកម្សាន្តទៀតឡើយ ។
ប្រភព ៖ ទីតាំងទេសចរណ៍នៃព្រះរាជាណាចក្រកម្ពុជា (English Version) Keo Phoung, 2003
ស្រុកកំពង់សៀម
ស្រុកកំពង់សៀម ជាស្រុកមួយនៃ ខែត្រកំពង់ចាម ។ ទីរួម ស្រុកកំពង់សៀម ស្ថិតនៅប្រហែល 3 គីឡូម៉ែត្រខាងលិចទីរួម ខែត្រកំពង់ចាម ដោយស្ថិតនៅ ភូមិអម្ពិលលើ ឃុំអម្ពិល ចម្ងាយប្រហែល 120 គីឡូម៉ែត្រពី រាជធានីភ្នំពេញ ។
នៅខែកុម្ភៈ ឆ្នាំ 2007 កងសន្តិភាពរបស់សហរដ្ឋអាមេរិក (United States Peace Corps) បានបញ្ជូនអ្នកស្ម័គ្រចិត្ត 29 នាក់មកពី San Francisco ឲ្យមកស្នាក់នៅ ស្រុកកំពង់សៀម ។ នេះជាលើកដំបូងបំផុតដែលកងសន្តិភាពត្រូវបានបញ្ជូនមក ប្រទេសកម្ពុជា ។ ក្នុងកំឡុងពេល 9 សប្ដាហ៍ដែលពួកគេស្នាក់នៅទីនេះ ពួកគេបានរៀនភាសាខ្មែរ សម្របខ្លួនទៅតាមជីវិតរបស់ប្រជាជនមូលដ្ឋាន រៀនហូបអាពីង និង បង្រៀនភាសាអង់គ្លេស ។
ទីតាំង
ស្រុកកំពង់សៀម ស្ថិតនៅចំកណ្ដាល ខែត្រកំពង់ចាម ហើយហ៊ុំព័ទ្ធដោយស្រុកដទៃទៀត ។ ទិសខាងជើងជាប់និង ស្រុកស្ទឹងត្រង់ ឯខាងកើតជាប់និង ស្រុកក្រូចឆ្មារ និង ស្រុកត្បូងឃ្មុំ ។ ខាងត្បូងជាប់និង ស្រុកកោះសូទិន ឯខាងលិចជាប់ 3 ស្រុកគឺ ស្រុកកងមាស ស្រុកព្រៃឈរ និង ស្រុកចម្ការលើ ។ ស្រុកកំពង់សៀម ហ៊ុំព័ទ្ធទីរួម ក្រុងកំពង់ចាម ពីគ្រប់ 3 ទិស (ទិសខាងកើតទន្លេ) ។
រដ្ឋបាល
| ឃុំ | ភូមិ |
|---|---|
| អម្ពិល | អណ្ដូងច្រុះ, អម្ពិលលើ, អម្ពិលក្រោម, បន្ទាយថ្ម/ថ្មី, ស្រឡៅ, ជើងគោក, រលៀក, រមាស, ក្រឡា, ជង្ហុក, វាលស្បូវ, ស្យា |
| ហាន់ជ័យ | ហាន់ជ័យ, ក្រូចសើច, មាន់ហើរ, ល្វាទេរ |
| កៀនជ្រៃ | ព្រែកយួន, ឥន្ទនេល, ស្ពានថ្មី, បឹងបបុស, កៀនជ្រៃក្រៅ, កៀនជ្រៃក្នុង |
| គគរ | គគរ 1, គគរ 2, ចម្ការសាមសិប, កំពង់ក្របី |
| កោះមិត្ត | កោះប៉ែន ក, កោះប៉ែន ខ, កោះប៉ែន គ, កោះគល់, កោះដាច់, កោះព្រលុង, ស្វាយជ្រុំ, កោះចាស់, កំពង់ត្រុំលើ, កំពង់ត្រុំក្រោម |
| កោះរកា | កោះរកាក្រៅ, កោះរកាក្នុង, ដំបងដែក, អូរឈ្លើង, តាមាង, ថ្មី |
| កោះសំរោង | ភូមិ 1, ភូមិ 2, ភូមិ 3, ភូមិ 4, ភូមិ 5, ភូមិ 6, ភូមិ 7, ភូមិ 8 |
| កោះទន្ទឹម | កោះកុក ក, កោះកុក ខ, កោះប្រាក់ក្រោម, កោះប្រាក់ក្នុង, កោះប្រាក់លើ |
| ក្រឡា | ស្ដេចនន, ទួលបេង, អណ្ដូងពោធិ, ទួលពពេល, ត្រពាំងជ្រៃ, ត្រពាំងត្រស់, ត្រពាំងឫស្សី, អង្កួញដី, អម្ពិលជ្រុំ, ថ្មី, ត្រពាំងថ្ម, ត្រពាំងចារ, ត្រកួន |
| អូរស្វាយ | ព្រៃចក្រី, ត្រពាំងកក់, អន្លង់ស្នូក, អម្ពិលក្រញាញ់, អូរស្វាយ, អូរធ្នង់, ខែលជ័យ |
| រអាង | ថ្មគោល, វាលខ្សាច់, ប្រសំ, ពង្រ, រមូល, ទួលរកា, រអាងលើ, រអាងក្រោម |
| រំចេក | ឈើទាលស្រុតក្រោម, ឈើទាលស្រុតលើ, រំលេច, ថ្មី |
| ស្រក | ល្ពាក, ស្រក, ព្រៃគុយ, តាម៉ូវ (បង្កើតថ្មី) |
| ទ្រាន | ច្រកស្ដៅ, វាលគ្រៀន, ទ្រាន, ត្រពាំងតាសុខ, ប្រថង, ប៉ែន, ទួលចំបក់, ច្រនៀង, ត្រពាំងអំពិល, តាខុង, ទួលត្រាច, ពោន |
| វិហារធំ | ព្រៃផ្ដៅ, អណ្ដូងស្វាយ, គោកគ្រាម, ក្ដីបឹង, ពង្រ, ប្រាសាទ, គោកទទា, វិហារ, គងមហា |
ប្រជាសាស្ដ្រ
តាមជំរឿនឆ្នាំ 1998 ប្រជាជនសរុបក្នុងស្រុកមានចំនួន 99.056 នាក់ ត្រូវជា 18,884 គ្រួសារ ។ ចំនួនមនុស្សជាមធ្យមក្នុងមួយគ្រួសារគឺ 5,2 នាក់ ច្រើនជាងចំនួនមនុស្សជាមធ្យមក្នុងមួយគ្រួសារនៅជនបទរបស់កម្ពុជាដែលមានចំនួន 5,1 នាក់ ។ អត្រាភេទគឺ 92,0% ដែលបង្ហាញថាស្ត្រីមានចំនួនច្រើនជាងបុរស ។
***
ប្រភព ៖ Wikipedia
ស្ពានគីហ្ស៊ូណា 絆
នៅឆ្នាំ 2001 ស្ពានគីហ្ស៊ូណា ត្រូវបានសម្ពោធឲ្យប្រើប្រាស់ ។ ជាស្ពានទីមួយដែលឆ្លងកាត់ ទន្លេមេគង្គកម្ពុជា ការសាងសង់ត្រូវចំណាយពេលអស់ 3 ឆ្នាំ និងទឹកប្រាក់ចំនួន 56 លានដុល្លារអាមេរិក ជាជំនួយពី រដ្ឋាភិបាលជប៉ុន ។ ស្ពាននេះមានប្រវែង 1500 ម៉ែត្រ ជាប់ចំណាត់ថ្នាក់ជាស្ពានវែងជាងគេនៅ ប្រទេសកម្ពុជា រហូតដល់ ស្ពានកម្ពុជា-ថៃ ត្រូវបានសាងសង់នៅ ខែត្រកោះកុង នៅឆ្នាំ 2002 ដែលមានប្រវែង 1900 ម៉ែត្រ ។ ស្ពាននេះជាស្ពានទីមួយដែលភ្ជាប់ត្រើយខាងកើត និង ត្រើយខាងលិចនៃ ប្រទេសកម្ពុជា ។ មនុស្សប្រហែលជា 10,000 នាក់ បានចូលរួមអបអរពិធីសម្ពោធស្ពាននេះ (រួមមានខ្ញុំផងដែរ) ។
ពាក្យ គីហ្ស៊ូណា ជាភាសាជប៉ុន 絆 មានន័យថា ចំណងភ្ជាប់
ប្រភព ៖ Wikipedia
ក្រុងកំពង់ចាម
ស្រុកកំពង់ចាម បច្ចុប្បន្នបានក្លាយខ្លួនជា ក្រុងកំពង់ចាម ។ ក្រុងនេះស្ថិតនៅតាមបណ្ដោយផ្លូវជាតិលេខ 7 ហើយមានចម្ងាយ 124 គីឡូម៉ែត្រពី រាជធានីភ្នំពេញ ។
ទីតាំង
ក្រុងកំពង់ចាម មានទំហំតូចជាងស្រុកនានានៅក្នុង ខែត្រកំពង់ចាម ។ ក្រុងកំពង់ចាម ជាប់នឹង ស្រុកកំពង់សៀម ពី 3 ទិស (លិច ជើង ត្បូង) ឯខាងកើតវិញជាប់នឹង ទន្លេមេគង្គ ។
រដ្ឋបាល
| ឃុំ | ភូមិ |
|---|---|
| បឹងកុក | បឹងកុក 1, បឹងកុក 2, ចុងថ្នល់ 1, ចុងថ្នល់ 2, ឡឥដ្ឋ, ជ្រោយថ្ម, មេម៉ាយ |
| កំពង់ចាម | ភូមិ 7, ភូមិ 8, ភូមិ 9, ភូមិ 10, ភូមិ 11, ភូមិ 12, ភូមិ 13, ភូមិ 14, ភូមិ 15 |
| សំបួរមាស | រកាលើ, រកាក្រោម, នាងគង្ហីង, បឹងបាសាក់, ចម្ការខ្ពប, បឹងស្នាយ, ព្រែកដើមចាន់, ព្រែកជីក, កំពង់រលីង |
| វាលវង់ | ភូមិ 1, ភូមិ 2, ភូមិ 3, ភូមិ 4, ភូមិ 5, ភូមិ 6 |
ប្រជាសាស្ត្រ
តាមជំរឿនឆ្នាំ 1998 ប្រជាជនសរុបក្នុងក្រុងមានចំនួន 45.354 នាក់ ត្រូវជា 8.236 គ្រួសារ ។ ក្រុងកំពង់ចាម ជាមានចំនួនប្រជាជនតិចជាងស្រុកដទៃនៅក្នុងខែត្រផងដែរ ។ ចំនួនមនុស្សជាមធ្យមក្នុងមួយគ្រួសារគឺ 5,4 នាក់ តិចជាងចំនួនមនុស្សជាមធ្យមក្នុងមួយគ្រួសារនៅទីប្រជុំជនរបស់កម្ពុជាដែលមានចំនួន 5,5 នាក់ ។ ទោះជាយ៉ាងណា ក្រុងនេះមានទំហំគ្រួសារធំជាងទំហំគ្រួសារស្រុកដទៃទៀតនៅក្នុងខែត្រ ដែលបញ្ជាក់ថាទីនេះជា ទីប្រជុំជន។ អត្រាភេទគឺ 94,9% ដែលបង្ហាញថាស្ត្រីមានចំនួនច្រើនជាងបុរស ។
***
ប្រភព៖ Wikipedia
សូមជម្រាបសួរ
ជម្រាបសួរ !
ប្លុកនេះបង្កើតឡើងក្នុងគោលបំណងផ្សព្វផ្សាយអំពីខែត្រកំពង់ចាម ។ អត្ថបទដែលត្រូវផ្សព្វផ្សាយនឹងនិយាយអំពី រមណីយដ្ឋានទេសចរណ៍ ភូមិសាស្ត្រ ប្រជាសាស្ត្រ របស់ខែត្រ ។
សូមអរគុណសម្រាប់ការចូលមកទស្សនា
តាម៉ាប់ និង យាយម៉ាប់
នៅទីនេះ
កំពង់ចាម កំពង់ចិត្ត 